Бу шимбәдә Әлмәт театры стационарда 81нче сезонын япты.
Димәк, августка кадәр театр бинасында кичке спектакльләр булмаячак. Ләкин күңелсезләнергә ашыкмагыз!
Июньдә без сезне Татарстан нефтенең 60 еллыгы исемендәге паркта Театраль җомгада көтәбез. Спектакльне ачык һавада уйнаячакбыз.
Ә сезон ябылышында гадәти булмаган хәл булды: без тамашачыларыбызны хөрмәтләдек. 30 кешегә "Атказанган тамашачы" дигән күкрәк билгесе тапшырылды. Алар 81нче сезонның 12 дән артык спектаклен караганнар.
Тапшырылган бүләкләр:
- Күкрәк билгесе.
- 82 нче сезон спектакльләренә билетларга 20% ташлама.
- Спонсорлардан сертификатлар.
- Театрның юбилей фотокитабы.
- Киләсе сезонның беренче премьерасына сертификат.
Өч артистыбызга зур бүләк – "Мәдәнияттәге казанышлары өчен" күкрәк билгесе тапшырылды.
Алар: Миләүшә Юзаева, Энҗе Сәйфетдинова, Диләрә Фазлыева.
Театраль җомга көнне без театрыбызның тамашачыларга күренми торган башка хезмәткәрләрен дә котлаячакбыз.
Театрда эш дәвам итә. Актив рәвештә фестиваль эшчәнлеге алып барыла. Яшь тамашачыларга профилактик әкиятләр күрсәтәбез. Эшләрне тәртипкә китерәбез, премьералар әзерлибез, яңа спектакльләр куюны планлаштырабыз.
