Әлмәт татар дәүләт драма театрының иҗат төркеме 16-24 ноябрьдә Омск өлкәсенең Тара шәһәрендә узган «Сотоварищи» VI Бөтенроссия фестивалендә ике дипломга лаек булды. «Дөм» спектакле «Иң яхшы музыкаль бизәлеш» һәм «Иң яхшы сценография һәм костюмнар» номинацияләрендә җиңү яулады.
Омск дәүләт Северный драма театры оештырган Фестиваль Михаил Ульянов истәлегенә һәм Тара шәһәренең 430 еллыгына багышланган иде. Быел фестиваль кысаларында Россиянең төрле шәһәрләреннән «Киләчәк заман геройлары» темасына багышланган 10 куелыш тәкъдим ителде.
Лев Толстойның драмасы буенча Лиза Бондарь куйган «Дөм» спектакле татарча синхрон тәрҗемә белән күрсәтелде. Фестиваль профессиональ танылу гына түгел, җылы аралашу мәйданчыгына да әверелде. Әлмәт труппасы Көнбатыш Себер төбәгендәге татар диаспорасы белән очрашты: бергәләп халык җырларын җырладылар, җылы аралаштылар.
Театрны лаеклы җиңү белән котлыйбыз, татар телен һәм мәдәниятен Бөтенроссия дәрәҗәсендә танылу өчен рәхмәт белдерәбез.
