1-3 ноябрь, 4 спектакль, параллель программаның 9 вакыйгасы.
Яңа исемнәр, тәҗрибәле театр эшлеклеләре, сынчылар, рәссамнар, мәгърифәтчеләр.
Тамашачылар лекцияләргә теркәлергә, кызыксындырган спектакльләргә, мастер-классларга, экскурсияләргә (алдан язылу буенча!) килергә мөмкин. Барлык мәгълүмат arkadash.tatar сайтында. Аркадаш сайтының афишасында сез Әлмәт театры бинасында узачак вакыйгалар белән таныша аласыз.
3 ноябрь 19:00 - "Аркадаш" театраль проектының "Балбаллар" спектакле
Балбаллар — гасырлар кичеп, безнең көннәргә килеп җиткән серле таш сыннар, тораташлар. Аларның нинди максаттан куелуын хәзер төгәл генә әйтү мөмкин дә түгелдер. Фаразларның берсе буенча балбалларны әрвахларга (шушы нәсел-ырудан булган мәрхүмнәр рухына) багышлап куйганнар.
Бер кулына касә тоткан кеше рәвешендәге балбаллар бар. Шундый балбаллар янында мәҗлес кора торган булганнар, әрвахларның рухларын шулай шат кылганнар, дип сөйлиләр. Әрвахларны искә алу мәҗлесләрендә кеше үз нәселенең ярдәмен тойган, көч алган.
Дәвамы: 50 минут.
Проект «Татнефть» хәйрия фонды тарафыннан гамәлгә ашырыла.
